दैनिक ज्यालादारी गर्ने २५ हजार जना मजदुरको खर्च सलमान खानले ब्यहोर्ने।

बलिउडको सुपरस्टार,(भाईजान) उपनामले परिचित सहयोगी मनका धनी सलमान खानले कोभिड–१९ का कारण लकडाउनका बीच फिल्म उद्योगका २५ हजार दैनिक ज्यालादारी गर्ने मजदुरको खर्च वहन गर्ने बताएका थिए ।

भारतीय मिडियाले समाचारमा उल्लेख गरेअनुसार फेडरेशन अफ वेस्टर्न इन्डिया सिने इम्प्लोइज (एफडब्ल्यूआइसीई) ले १९ हजार श्रमिकको खाता विवरण प्राप्त गर्यो । तीमध्ये केही श्रमिकले स्वेच्छाले आफ्नो आर्थिक स्थिती महामारीसँग जुध्नका लागि स्थिर भएको बताउँदै एफडब्ल्यूआईसीईसँग पैसाको आवश्यकता पर्नेहरुलाई सहयोग गर्न अपिल गरेका छन् ।

एफडब्ल्यूआइसीईका महासचिव अशोक दुबेले सदस्य कर्मचारीको यो कदमको तारिफ गर्दै र यसबारे पुष्टि गर्दै भने, ‘सलमान खानले २५ हजार कर्मचारीको विवरण माग गरेका थिए । हामीले १९ हजार सदस्य कार्यकर्ताको विवरण प्राप्त गर्यौं । जसमध्ये ३ हजार कामदारले पहिले नै यशराज फिल्म्सबाट ५ हजार भारु पाइसकेका थिए । त्यसकारण हामीले बाँकी भएका १६ हजार श्रमिकको विवरण सलमान खानलाई पठाएका छौं र उनले पैसा पठाउन सुरु गरिसकेका छन् । चाँडै नै सबैले पैसा पाउनेछन् ।’