पोखरा । अनिल गुरुङको उत्कृष्ट प्रदर्शनसँगै भारतको सिक्किम युनाइटेडलाई ५–२ ले पराजित गर्दै थ्री स्टार क्लब पोखरामा जारी आहा रारा गोल्डकपको सेमिफाइनलमा प्रवेश गरेको छ । थ्री स्टारको जितमा अनिल गुरुङले हृयाट्रिक गरे । अनिलले सिजनकै उत्कृष्ट प्रदर्शन गर्दै हृयाट्रिक गरेका हुन् । उनले खेलको २६औं र ८१ औं मिनेटमा पेनाल्टीमा गोल गरेका थिए भने ८५औं मिनेटमा अजयी मार्टिन्सको पासलाई सदुपयोग गर्दै गोल गरेका थिए । ५०औं मिनेटमा सिक्किमका जिग्मी दोर्जे भुटियाको आत्मघाती गोल उपहार पाएको थ्री स्टारका लागि ७१औं मिनेटमा अजयी मार्टिन्सले अर्को गोल थपे । युनाइटेड सिक्किम फुटबल क्लब, भारतका लागि खेलको ८९औं मिनेटमा सोनाम छिरिङ भुटियाले र अन्तिम इन्जुरी समयको तेस्रो मिनेटमा छिरिङ लोप्चाले पेनाल्टीमार्फत् गोल गरेका थिए । हृयाट्रिक गरेका अनिल गुरुङ म्यान अफ द म्याच भएका छन् । उनले ट्रफीसहित नगद पाँच हजार प्राप्त गरे ।
