शाहआलम (मलेसिया):= म्याग्दी प्रवासी नेपाली संघ (मोना) मोना मलेसियाको आयोजनामा हुन गइरहेको तेस्रो मोना मलेसिया भलिबल कप २०२६ को तयारी तीव्र पारिएको छ। हरिराया पर्वको अवसर पारेर आयोजना गरिन लागेको प्रतियोगिता यहीँ मार्च २१ र २२ तारिखको दिन G-Pet Hotel Shah Alam मा सम्पन्न हुनेछ।
आयोजकका अनुसार मलेसियाका विभिन्न राज्यबाट क्लब तथा टिमहरूको उल्लेखनीय सहभागिता रहने अपेक्षा गरिएको छ। प्रतियोगिता खुला पुरुषतर्फ हुनेछ र नटआउट प्रणालीमा खेलाइनेछ। खेल अवधिभर अनुशासन, समयपालन र खेल भावना प्राथमिकतामा राखिने जनाइएको छ।
आकर्षक पुरस्कार र विधागत सम्मान
प्रतियोगितामा प्रथम, दोस्रो र तेस्रो स्थान हासिल गर्ने टिमलाई क्रमशः आरएम ३,५०१ , आरएम २,५०१ र आरएम १,२०१ नगदसहित कप, मेडल तथा प्रमाणपत्र प्रदान गरिनेछ। साथै बेस्ट स्पाईकर , एस्ट ब्लकर र बेस्ट प्लेयर लाई विशेष ट्रफी तथा सम्मानपत्र प्रदान गरिनेछ।
दर्ता र व्यवस्थापन
प्रति टिम दर्ता शुल्क आरएम ४९९ तोकिएको छ। दर्ता पश्चात शुल्क फिर्ता नहुने र खेल तालिका आयोजक समितिले सार्वजनिक गर्ने जनाएको छ। बाहिरबाट आउने खेलाडी तथा समर्थकका लागि आवश्यक समन्वय र व्यवस्थापनको तयारी भइरहेको आयोजकले जानकारी दिएको छ।
सांस्कृतिक तथा सामुदायिक महत्व
मोना मलेसियाले खेलकुदमार्फत प्रवासी नेपाली समुदायबीच आपसी एकता, सद्भाव र सहकार्य अभिवृद्धि गर्ने उद्देश्य लिएको जनाएको छ। भलिबल कपसँगै भाग्यशाली चिठ्ठा कार्यक्रमसमेत आयोजना गरिने भएकाले कार्यक्रम थप आकर्षक बन्ने अपेक्षा गरिएको छ।
आयोजकले मलेसियामा रहेका सम्पूर्ण नेपाली समुदायलाई उक्त प्रतियोगिता सफल बनाउन उपस्थित भई हौसला प्रदान गर्न सार्वजनिक हार्दिक आह्वान गरेको छ।
