काठमाडौं । पूर्व प्रहरी नायव महानिरीक्षक (डीआईजी) रमेश खरेलको संयोजकत्वमा रहेको ‘हाम्रो नेपाल सुशासन अभियान’ले कोरोना भाइरसको रोकथाम, नियन्त्रण तथा बिरामीको उपचारमा खटिने सुरक्षाकर्मी, चिकित्सक र नर्सलाई प्रोत्साहित गर्न सरकारको ध्यानाकर्षण गराएको छ । अभियानले शनिबार जारी गरेको ६ बुँदे ध्यानाकर्षणमा भनिएको छ, ‘कोरोना संंक्रमण अन्य प्राकृतिक विपदभन्दा विल्कुलै फरक भएका कारण हामीले चाहेर पनि प्रत्यक्ष रूपमा अघि सरेर योगदान गर्न नसकिने अवस्था भएकाले जिम्मेवार र तुलनात्मक रूपमा सुरक्षित भई कार्य गर्ने क्षेत्रबाट देखाउने क्रियाशिलताको ठूलो भूमिका रहेको छ । यो भनेको राज्य संयन्त्रको अगुवाई र भूमिका नै हो । जिम्मेवार पदमा आसिनहरूले यो संकटको घडीमा खेल्ने भूमिका र देखाउने योग्यता महत्त्वपूर्ण हुन्छ ।’ यो संकटपूर्ण घडीमा संक्रमित व्यक्तिको पहिचान र द्रुत आइसोलेसन तथा उपचार , सामाजिक दुरी पालना र लकडाउनमा सबैको ध्यान जानु आवश्यक रहेको पनि अभियानले प्रष्ट पारेको छ । अप्रत्यासित रूपमा आएको यो संकटले विप्पन्न र गरिब वर्गलाई बढी पीडा दिएको हुँदा रोजगारविहीन अवस्थामा जीवनयापनका लागि सरकारले तुरुन्त आर्थिक राहत उपलब्ध गराउन जरुरी भएको अभियानको ठहर छ । सर्वसाधारणलाई अत्यावश्यक खाद्यलगायत वस्तुहरूको आपूर्तिका लागि भरपर्दो र सुरक्षित उपाय अवलम्बन गरिनुपर्ने आवश्यकता देखिएको पनि जनाइएको छ । ध्यानाकर्षण पत्रमा भनिएको छ, ‘यो संकटको घडीमा अहोरात्र खटिएका डाक्टर, नर्स, प्यारामेडिकल, सुरक्षाकर्मीलगायत राष्ट्रसेवकहरूलाई उनीहरूको जीवनरक्षा गर्न र कार्यको मूल्यांकन गर्दै उत्प्रेरणा जगाउन राष्ट्रले यथेष्ट ध्यान पुर्याइ साधनस्रोत सम्पन्न बनाउन अपरिहार्य विषय छ ।’ लकडाउन परिचालनका लागि सहर–बजारमा ध्यान केन्द्रित भएको अवस्थामा देश बाहिर (रोजगारीबाट) आएका र सहरबाट गाउँतर्फ गएका व्यक्तिहरूबाट अवस्थाको पालना भए–नभएको बारे सम्बन्धित निकायले ध्यान पुर्याइ यो कुराको महत्त्व दिई सामाजिक चेतना जगाउन यथेष्ट ध्यान दिन पनि अभियानले माग गरेको छ । ‘यो संकटपूर्ण बेला सबैले नैतिकता, इमानदारिता र पारदर्शिता कायम गरी सुशासनको प्रत्याभूति गर्नु परम कर्तव्य हुन आउँछ,’ ध्यानाकर्षणपत्रमा भनिएको छ, ‘कालोबजारी, मिसावट, लुकाउने, होर्डिङ गर्ने, भ्रष्टाचार गर्ने प्रवृत्ति महापाप हो र यसलाई सबैले बुझ्नु र मनन गर्नु परम कर्तव्यको विषयसमेत हो । यो महामारीबाट हामी सबै चाँडै मुक्त हुन सकौं ।’
