काठमाडौं । चिनियाँ ह्याकरले नेपाल इलेक्ट्रोनिक पेमेन्ट सिष्टम (नेप्स) को सिष्टम ह्याक गरी करोडौं रुपैयाँ चोरी गरेको घटना छानविन गर्न बनेको समितिले बुधबार राष्ट्र बैंकका गर्भनर डा. चिरञ्जीवी नेपाललाई प्रतिवेदन बुझाएको छ । समितिले दुई दिनमै प्रतिवेदन बुझाउँदै ह्याक भएको रकममध्ये एक करोड ८९ लाख रिकभरी भइसकेको जनाएको छ । एटिएमबाट ह्याक भएको रकममध्ये करिब चार लाख मात्रै रिकभर हुन बाँकी छ । भारतबाट निकालिएको एक करोड ५ लाख भने रिकभरी हुन बाँकी रहेको हो । समितिका संयोजक बमबहादुर मिश्रका अनुसार सबै बैंकलाई चिप बेसको कार्ड प्रयोगमा ल्याउन सुझाव दिइएको छ । सूचना प्रविधिमा पर्याप्त खर्च गरेर वित्तीय बजारको आइटी प्रणालीलाई अझ बलियो बनाउनुपर्ने पनि उनले सुझाव दिइएको छ । चिनियाँ नागरिकले एटिएम ह्याक गरेर पैसा चारेको घट्ना सार्वजनिक भएको दिन आइतबार नै राष्ट्र बैंकले ५ सदस्यीय समिति बनाएर सोमबारदेखि अनुसन्धान थालेको थियो । राष्ट्र बैंकका भुक्तानी सेवा प्रणालीका कार्यकारी निर्देशकको संयोजकत्वमा बनेको समितिमा राष्ट्र बैंक सुपरिवेक्षण विभागका एक जना प्रतिनिधि, राष्ट्र बैंक आइटी प्रमुख, बैंकर्स र नेप्सका सिइओ रहेका थिए ।
