क्वालालम्पुर (मलेसिया):= मलेसिया सरकारले बढ्दो जीवनयापनको लागत र महँगीको सामना गरिरहेका आफ्ना नागरिकहरूलाई थप राहत दिने उद्देश्यले ‘सुम्बाङ्गन आसस रहमा’ (SARA) सहायता कार्यक्रम अन्तर्गतको आर्थिक अनुदान राशिमा छिट्टै वृद्धि गर्ने भएको छ।
प्रधानमन्त्री अनवर इब्राहिमले देशमा विद्यमान आर्थिक दबाबलाई कम गर्न र लक्षित विपन्न वर्गको दैनिक गुजारालाई सहज बनाउन यो कदम चाल्न लागिएको जानकारी दिएका छन्। सरकारको यो निर्णयले विशेष गरी न्यून आय भएका परिवारहरूलाई ठूलो आर्थिक राहत पुग्ने अपेक्षा गरिएको छ।
प्रधानमन्त्री अनवरले यस सहायता वृद्धिको विस्तृत खाका र कार्यान्वयन प्रक्रिया आगामी राष्ट्रिय बजेटमार्फत सार्वजनिक गरिने स्पष्ट पारेका छन्। सरकारले यो अनुदान बढाउनका लागि आवश्यक गृहकार्य गरिरहेको र यसलाई देशको वर्तमान आर्थिक अवस्था सुहाउँदो बनाइने उनले बताएका छन्।
यसअघि पनि सरकारले विभिन्न चरणमा ‘रहमा’ कार्यक्रम अन्तर्गत नागरिकहरूलाई नगद तथा खाद्यान्न सहयोग उपलब्ध गराउँदै आएको थियो। यो नीतिगत कदमले मलेसियाली सरकार नागरिकको दैनिक समस्या र महँगी नियन्त्रणप्रति कति संवेदनशील छ भन्ने कुरालाई प्रष्ट पारेको छ।
प्रधानमन्त्री अनवरले आफ्नो नेतृत्वको सरकार सधैं जनताको जीवनस्तर सुधार्न र आर्थिक चुनौतीहरूबाट जोगाउन प्रतिबद्ध रहेको कुरामा जोड दिएका छन्। यो सहायता वृद्धि आगामी महिनाहरूमा पूर्ण रूपमा लागू भएसँगै देशका लाखौं योग्य नागरिकहरू प्रत्यक्ष रूपमा लाभान्वित हुनेछन्।
