आईपीएल क्रिकेट : मुम्बई इण्डियन्सले ४ विकेटले चेन्नईलाई हरायो।

एजेन्सी:= इण्डियन प्रिमियर लिग (आईपीएल) अन्तर्गत शनिवार दिल्लीको अरुण जैट्ले स्टेडियममा सम्पन्न भएको खेलमा मुम्बई इण्डियन्सले चेन्नई सुपर किङ्समाथि ४ विकेट सहितको जित निकालेको छ।

साविक विजेता मुम्बई इन्डियन्सविरुद्धको म्याचमा २१९ रनको विशाल लक्ष्य दिएको चेन्नईले पराजय टार्न नसकेको हो।        टस जितेर मुम्बईले पहिला फिल्डिङ रोजेपछि ब्याटिङमा उत्रिएको चेन्नईले निर्धारित २० ओभरमा चार विकेटको क्षतिमा २१८ रनको ‘हाइस्कोर’ खडा गरेको थियो । तर मुम्बईले खेललाई अन्तिम बलसम्मै लम्ब्याउँदै चार विकेटको जित हासिल गरेको हो ।

२१९ रनको लक्ष्य पछ्याएको मुम्बईका लागि किरन पोलार्डले शानदार ब्याटिङ गर्दै ८७ रन बनाए । उनले ३४ बलमा ६ चौका र ८ छक्काको मद्दतमा उक्त रन बनाएका हुन् । यस्तै कप्तान रोहित शर्माले ३५, क्विन्टन डिककले ३८, क्रुनाल पाण्ड्याले ३२ रन बनाए ।

चेन्नइका साम करनले चार ओभरमा ३४ रन दिएर तीन विकेट लिए । यस्तै शार्दुल ठाकुर, रविन्द्र जडेजा र मोइन अलीले एक/एक विकेट लिए । यसअघि चेन्नईका लागि अम्बाती रायडुले विस्फोटक ब्याटिङ गर्दै २७ बलमै ७२ रन बनाएका थिए । उनले ४ चौका र ७ छक्का प्रहार गरे । यस्तै मोइन अलीले ५८ र फाफ डुप्लेसिसले ५० रन बनाए ।

मुम्बईका लागि जसप्रित बुमराह निकै महँगा बलर साबित भए । उनले चार ओभरमा ५६ रन दिएर एक विकेट लिए । यस्तै ट्रेन्ट बोल्टले चार ओभरमा ४२ रन दिएर एक विकेट लिए भने किरन पोलार्डले दुई ओभरमा १२ रन दिएर दुई विकेट लिए ।पराजयका बाबजुद चेन्नई अंक तालिकाको शीर्ष स्थानमा छ । यस्तै मुम्बई चौथो नम्बरमा छ ।