बालपनाको यादमा भुल्यौं कि मायाले

काठमाडौं । लामो समयदेखि पत्रकारितामा रहनुभएका गीतकार जनक रावलको नयाँ गीत ‘भुल्यौं कि मायाले…’ सार्वजनिक गरिएको छ । एलिना चौहान र रूपका डोटेलको स्वर तथा किरण माइकल घिमिरेको संगीतमा रहेको लोक प्याट्रनको गीतको भिडियो सार्वजनिक भएको हो । 

यादव पुडासैनीको निर्देशन रहेको गीतको भिडियोले बेहुला–बेहुली र राजा रानीको कथा बोकेको छ । गीतको भिडियो ओएसआर डिजिटलबाट बिहीबार सार्वजनिक गरिएको हो । सार्वजनिक गीत गीतकार रावलको ‘निश्चल प्योरनेश अफ हर्ट द म्युजिक’ एल्बम समावेश छ ।

सार्वजनिक गीतमा बालापनमा गोठालो गएको, मेलापात भरेको, पानी पँधेरो धाएको सम्झनाहरू प्रस्तुत गरिनुका साथैं भाँडाकुटी खेलेको, बेहुला–बेहुली बनेको, राजा रानी बनेको, लुकामारी खेलेको कुरालाई नबिर्सिएर ताजैं स्मरण गरेको भावहरू छर्लंग दर्शाइएको हेर्न पाइन्छ । गीतकार रावलले निश्चल एल्बमको ‘म माया लाउँदिन’ बोलको गीत सार्वजनिक गरेको केही दिनमा सोही एल्बमको अर्को गीत ‘भुल्यौं कि मायाले…’ सार्वजनिक गर्नुभएको हो । 

गीतको भिडियोमा बालापनको अभिनयमा निश्चल र निकिशा लाई प्रस्तुत गरिएको छ भने तिनै बालबालिकाको युवाअवस्थाको प्रस्तुतिमा रमेशचन्द सोडारी र रोली तामाङलाई फिचरिङ गरिएको छ । नारायण रिजालको कोरियोग्राफी रहेको गीतको भिडियोमा कन्सेप्ट र क्रियशन गीतकार स्वयंको छ । सुरज लामिछानेको मुख्य सहायक निर्देशन रहेको गीतको भिडियोमा सुरेश बज्राचार्यको छायांकन र मित्रदेव गुरुङको सम्पादन छ ।

गीत जति राम्रो छ गीतको भिडियो त्यतिकै उत्कृष्ट बनेको छ । सञ्चारकर्मी जनक रावलका पाँच दर्जनभन्दा बढी गीत श्रोता÷दर्शकमाझ आइसकेका छन् । धेरै गीतमार्फत उहाँ श्रोता÷दर्शकको मन मष्तिस्कमा बस्न सफल हुनुभएको छ । ‘यसपालि लोकप्याट्रनको अलिक पृथक गीत पस्किएको छु आशा छ मेरो यसअघिका गीतजस्तै यसले सबैको साथ सहयोग पाउनेछ’, जनकले भन्नुभयो ।