बेलायत (लण्डन) := शेर्पा सङ्घ बेलायतका अध्यक्ष साना शेर्पाको कोरोना संक्रमणबाट निधन भएको छ । भोजपुर स्थायी घर भएका ५१ वर्षीय शेर्पाको उपचारका क्रममा लण्डनको सेन्ट थोमस अस्पतालमा सोमबार दिउँसो १ बजे निधन भएको पाल्पा समाज युकेका अध्यक्ष वाचस्पति रेग्मीले जानकारी दिए ।
गत असार २९ गते कोरोना सङ्क्रमण देखिएपछि उनलाई केन्टको विलियम हार्भी अस्पतालमा भर्ना गरिएको थियो तर दुई हप्तासम्म पनि कुनै सुधार नभएपछि लण्डनको सेन्ट थोमस अस्पतालमा सारिएको थियो । एक साताअघि कोरोना परीक्षण गर्दा सङ्क्रमण मुक्त भएको भनिए पनि उनको कलेजोको समस्यामा भने कुनै सुधार हुन सकेको थिएन ।
शेर्पाको निधनमा नेपाल आदिवासी जनजाती महासंघ युकेले संवेदना प्रकटगर्दै शोक वक्तव्य जारी गरेको छ।
शेर्पाले आदिवासी जनजातीहरुको लागी पुर्याएको योगदानको कदरगर्दै मृत शेर्पाको आत्माको चिर शान्तीको कामना सहित वक्तव्य जारी गरिएको हो। भूतपूर्व गोर्खा सैनिक रहेका शेर्पा आफ्ना तीन छोरा र श्रीमतीसहित बेलायतको केन्टमा बस्दै आएका थिए । उनका बुबाआमा भने नेपालमै छन् ।
