मेलाका (मलेसिया):= मलेसियाको मेलाका राज्यस्थित सडक यातायात विभाग (JPJ) ले राष्ट्रिय सुरक्षा परिषद् (MKN) सँगको सहकार्यमा विदेशी चालक लक्षित विशेष अपरेशन (PeWA) सञ्चालन गर्दै ४० विदेशी नागरिकमाथि कारबाही गरेको छ। अपरेशनका क्रममा ४० वटा सवारीसाधन नियन्त्रणमा लिइएको छ।
लिम्बोङ्गान र मालिम, मेलाका तेङ्गाह क्षेत्रमा बिहान ६ बजेदेखि ११ बजेसम्म सञ्चालन गरिएको अपरेशनमा ३४ वटा मोटरसाइकल र ६ वटा अन्य सवारीसाधन जफत गरिएको JPJ ले जनाएको छ।
जाँचका क्रममा १२ जना रोहिङ्ग्या, १० जना पाकिस्तानी, ७ जना इन्डोनेसियाली, ५ जना बंगलादेशी, ४ जना म्यानमारका नागरिक तथा २ जना भारतीय गरी ४० विदेशी नागरिकलाई जाँच गरिएको थियो।
अपरेशनका क्रममा विभिन्न कानुनी उल्लङ्घनका १३१ वटा नोटिस जारी गरिएको छ। प्रमुख उल्लङ्घनहरूमा:
- सक्षम सवारी चालक अनुमतिपत्र (CDL) बिना सवारी चलाएको – ८० वटा
- प्राविधिक खराबी भएका सवारी – २१ वटा
- वैध सवारी इजाजतपत्र (LKM) नभएको – १४ वटा
- बीमा नभएको – १४ वटा
- सवारी इजाजतपत्रको दुरुपयोग गर्दै तरकारी व्यवसाय सञ्चालन गरेको – २ वटा रहेका छन्।
JPJ मेलाकाले सडक सुरक्षालाई प्राथमिकतामा राख्दै कानुनविपरीत सवारी सञ्चालन गर्ने चालक तथा सवारीसाधनमाथि यस्ता विशेष अपरेशन आगामी दिनमा पनि निरन्तर सञ्चालन गरिने जनाएको छ। विभागले सडक प्रयोगकर्ताको सुरक्षाका लागि कानुन कार्यान्वयनमा कुनै सम्झौता नगर्ने स्पष्ट पारेको छ।
