क्वालालम्पुर (मलेसिया):= मलेसियाको सेलाङ्गोर राज्य अन्तर्गत पर्ने क्लाङमा आफ्नै देशका साथीको ह’त्या गरेको आरोपमा एक म्यान्मारका फ्याक्ट्री कामदार विरुद्ध अदालतमा औपचारिक रूपमा मुद्दा दर्ता गरिएको छ। गत जुलाई ५ को राति पोर्ट क्लाङको तेलोक गोंगस्थित एक भवनमा ३२ वर्षीय म्यान्मारका नागरिक माउङ माउङले आफ्नै सहकर्मी म्यो थान नाइङको ह’त्या गरेको प्रहरी अनुसन्धानबाट खुलेको हो। २१ जुलाई २०२६ का दिन आरोपीलाई क्लाङको मजिस्ट्रेट अदालतमा उपस्थित गराई कानुनी कारबाहीको प्रक्रिया अगाडि बढाइएको छ।
अदालती सुनुवाइका क्रममा म्यान्मार भाषाका दोभाषेमार्फत आरोपी माउङ माउङलाई उनको गल्ती र लागेको आरोप पढेर सुनाइएको थियो, जसमा उनले टाउको हल्लाएर आफ्नो सहमति जनाएका थिए। मलेसियाको कानुनी प्रावधान अनुसार ह’त्या सम्बन्धी गम्भीर मुद्दाहरूको फैसला गर्ने अधिकार सिधै उच्च अदालत (High Court) लाई मात्र हुने भएकाले मजिस्ट्रेट अदालतमा आरोपीको तर्फबाट कुनै औपचारिक बयान वा आत्मसमर्पण रेकर्ड गरिएन। सरकारी वकिलले अदालत समक्ष आवश्यक कानुनी कागजपत्रहरू पेश गर्न थप समय माग गरेपछि मजिस्ट्रेट नोर् अजिला म्याटले यस मुद्दाको अर्को सुनुवाइ आगामी सेप्टेम्बर १५ का लागि तय गर्नुभएको छ।
आरोपी विरुद्ध मलेसियाको पेनल कोडको सेक्सन ३०२ (ह’त्या सम्बन्धी कानुन) अन्तर्गत मुद्दा चलाइएको छ, जसमा मलेसियाली कानुन अनुसार अत्यन्तै कडा सजायको व्यवस्था छ। यदि अदालतबाट उनी दोषी ठहरिएमा उनलाई मृ’त्युद’ण्डको सजाय हुन सक्छ। अदालतले मृ’त्युद’ण्ड नदिने फैसला गरेमा उनलाई न्यूनतम ३० देखि अधिकतम ४० वर्ष सम्मको जेल सजाय र अनिवार्य रूपमा कम्तीमा १२ कोर्रा हान्ने कानुनी प्रावधान रहेको छ। हाल आरोपी कानुन व्यवसायी (वकिल) विहीन छन् र उनलाई अदालतको आदेश अनुसार कडा सुरक्षाका साथ हिरासतमा राखिएको छ।
