क्वालालम्पुर:= लामो समयसम्म ओभरटाइम गर्न तयार हुने र कामको प्रकृति नछान्ने प्रवृत्तिका कारण मलेसियाको राजधानी क्वालालम्पुरमा रोजगारदाताहरूले विदेशी कामदारलाई प्राथमिकता दिने गरेको पाइएको छ।
क्वालालम्पुर अध्यागमन विभागका निर्देशक हम्शा इन्जाउका अनुसार सोमबार (जुलाई १३) राजधानीका १२ वटा व्यावसायिक प्रतिष्ठानमा गरिएको संयुक्त प्रवर्तन कारबाहीका क्रममा यस्तो तथ्य देखिएको हो।
“धेरै रोजगारदाताले विदेशी कामदार रोज्नुको मुख्य कारण उनीहरू ओभरटाइम गर्न तयार हुनु र कामको प्रकृति नछान्नु हो,” उनले कारबाहीपछि आयोजित पत्रकार सम्मेलनमा भने।
बिहान १०:१५ बजेदेखि सुरु भएको कारबाही विदेशी नागरिकले सञ्चालन गरेको वा विदेशी कामदारलाई रोजगारी दिएको आशंका गरिएका विभिन्न व्यावसायिक प्रतिष्ठानमा केन्द्रित थियो। कारबाहीअन्तर्गत सैलुन, सवारीसाधन मर्मत केन्द्र, रेस्टुरेन्ट तथा भोजनालय, कार वास सेन्टर र किराना पसललगायत १२ स्थानमा निरीक्षण गरिएको थियो।
अभियानमा क्वालालम्पुर अध्यागमन विभागका ३३ अधिकारी तथा क्वालालम्पुर सिटी हल (DBKL) का ११ प्रवर्तन कर्मचारी सहभागी थिए।
कारबाहीका क्रममा कुल ३९ जनाको कागजात जाँच गरिएकोमा २५ देखि ३२ वर्ष उमेर समूहका १८ विदेशी नागरिकलाई विभिन्न अध्यागमनसम्बन्धी कसुरमा पक्राउ गरिएको छ। पक्राउ पर्नेमा इन्डोनेसिया, बंगलादेश, भारत, म्यानमार र पाकिस्तानका नागरिक रहेका छन्।
उनीहरूमाथि वैध परिचयपत्र तथा यात्रा कागजात नहुनु, भिसा वा पासका सर्त उल्लंघन गर्नु, अनुमति अवधिभन्दा बढी समय बस्नु (ओभरस्टे) तथा आधिकारिक मान्यता नभएका कार्ड राख्नुलगायतका कसुर रहेको अध्यागमन विभागले जनाएको छ।
पक्राउ परेका सबैलाई थप अनुसन्धानका लागि क्वालालम्पुर अध्यागमन डिपोमा राखिएको छ। अनुसन्धानमा सहयोग गर्न दुई मलेसियाली नागरिकलाई ‘फारम २९’ नोटिससमेत जारी गरिएको निर्देशक हम्शाले जानकारी दिए।
उनले अध्यागमन कानुन उल्लंघन गर्नेविरुद्ध कुनै सम्झौता नगरी निरन्तर कारबाही गरिने चेतावनी दिएका छन्। अवैध आप्रवासीलाई आश्रय दिने वा रोजगारी दिने रोजगारदाता, व्यवसाय सञ्चालक तथा व्यक्तिमाथि पनि कानुनी कारबाही गरिने उनले स्पष्ट पारे।
साथै, उनले मलेसियामा गैरकानुनी रूपमा बसिरहेका विदेशी नागरिकलाई मे ३१, २०२७ सम्म सञ्चालन हुने आप्रवासी स्वदेश फिर्ती कार्यक्रम (PRM) २.० को लाभ उठाएर स्वेच्छिक रूपमा स्वदेश फर्किन आग्रह गरेका छन्।
