कोता किनाबालु:= मलेसियाको अध्यागमन विभाग (इमिग्रेशन) सबाहले सन् २०२६ मा हालसम्म कागजातविहीन तथा अवैध रूपमा बसोबास गरिरहेका ४,००५ विदेशी नागरिकलाई उनीहरूको सम्बन्धित देश फिर्ता पठाएको जनाएको छ।
शुक्रबार जारी गरिएको विज्ञप्तिअनुसार स्वदेश फिर्ता पठाइएकामध्ये सबैभन्दा धेरै २,५७८ जना फिलिपिन्सका नागरिक छन्। त्यसपछि १,२०७ जना इन्डोनेसियाली, १०० जना पाकिस्तानी, ८४ जना चिनियाँ, १८ जना भियतनामी तथा अन्य देशका १८ जना रहेका छन्।
पछिल्लो चरणमा बिहीबार पापार अध्यागमन डिपोबाट १२ जना चिनियाँ नागरिकलाई कोटा किनाबालु अन्तर्राष्ट्रिय विमानस्थल (KKIA) हुँदै चीनको ग्वाङ्झाउ पठाइएको छ। उनीहरूमा १० जना पुरुष र दुई जना महिला रहेका छन्।
अध्यागमन विभागका अनुसार ती सबैले मलेसियामा आवश्यक कानुनी प्रक्रिया पूरा गरेका थिए भने मलेसियास्थित चिनियाँ दूतावासमार्फत उनीहरूको यात्रा कागजात प्रमाणीकरण गरिएको थियो।
JIM सबाहले यो कार्यक्रम वैध कागजातबिना मलेसियामा बसिरहेका विदेशी नागरिकलाई कानुनी प्रावधानअनुसार स्वदेश फिर्ता पठाउने निरन्तर अभियानको एक हिस्सा भएको जनाएको छ।
अध्यागमन विभागले सर्वसाधारणलाई आफ्नो वरपर हुने गतिविधिप्रति सचेत रहन तथा अवैध आप्रवासीलाई आश्रय नदिन र रोजगारीमा नलगाउन आग्रह गरेको छ। साथै, अवैध आप्रवासीसम्बन्धी जानकारी मलेसियाको अध्यागमन विभागका आधिकारिक माध्यमबाट उपलब्ध गराउनसमेत अनुरोध गरिएको छ।
