क्वालालम्पुर (मलेसिया):= मलेसियाको अध्यागमन विभाग (JIM) ले २०२६ जुलाई ७ गते मध्यराति १२:३० बजे क्वालालम्पुरस्थित क्याप स्क्वायर सेन्टर (Cap Square Centre) आसपास विशेष अध्यागमन कारबाही सञ्चालन गरी १० जना बंगलादेशी नागरिकलाई पक्राउ गरेको छ।
पुत्राजायास्थित अध्यागमन मुख्यालयको गुप्तचर तथा विशेष अपरेसन शाखाका विभिन्न तहका अधिकारीहरूको टोलीले करिब एक महिनासम्म गरेको गोप्य निगरानी र प्राप्त सूचनाका आधारमा दुईवटा लक्जरी आवासीय अपार्टमेन्टमा छापा मारेको थियो।
कारबाहीका क्रममा ती अपार्टमेन्टको ‘हेरचाहकर्ता’ (Caretaker) को भूमिका निभाइरहेका दुई जना बंगलादेशी पुरुषसहित अन्य ६ जना पुरुष र २ जना महिलालाई पक्राउ गरिएको हो। पक्राउ परेकाहरूको उमेर २३ देखि ४३ वर्षबीच रहेको छ।
प्रारम्भिक अनुसन्धानमा एक जना बंगलादेशी पुरुषसँग निर्माण क्षेत्रको अस्थायी कार्य अनुमति (Temporary Employment Visit Pass) रहेको पाइएको छ। पक्राउ परेका दुई जना बंगलादेशी महिलालाई यसअघि नै मलेसियामा प्रवेश गर्न प्रतिबन्ध (Blacklist) लगाइएको भए पनि उनीहरू गैरकानुनी प्रवेश नाकामार्फत पुनः मलेसिया प्रवेश गरेको अनुसन्धानबाट खुलेको छ।
अन्य व्यक्तिसँग भने कुनै पनि वैध यात्रा वा बसोबाससम्बन्धी कागजात नभएको अध्यागमन विभागले जनाएको छ।कारबाहीका क्रममा अन्य व्यक्तिका ३ वटा बंगलादेशी राहदानी (पासपोर्ट) तथा यस अवैध गतिविधिबाट प्राप्त भएको आशंकामा RM १,५९५ नगद पनि बरामद गरिएको छ।
अनुसन्धानअनुसार ती लक्जरी अपार्टमेन्टहरूलाई अवैध रूपमा मलेसिया प्रवेश गरेका विदेशी नागरिकलाई अस्थायी रूपमा राख्ने ‘ट्रान्जिट हाउस’ का रूपमा प्रयोग गरिएको थियो। गैरकानुनी बाटोबाट मलेसिया प्रवेश गरेका व्यक्तिहरूलाई अन्तिम गन्तव्यमा पठाउनुअघि केही समय यस्ता घरमा राखिन्थ्यो। ती घरहरूको व्यवस्थापन विदेशी ‘केयरटेकर’हरूले गर्ने र प्रत्येक व्यक्तिबाट RM ७०० देखि RM १,५०० सम्म शुल्क लिने गरेको पाइएको छ। यो अवैध गतिविधि करिब एक वर्षदेखि सञ्चालन हुँदै आएको विश्वास गरिएको छ।
पक्राउ परेका दुई जना ‘केयरटेकर’ माथि अध्यागमन ऐन १९५९/६३ को धारा ५६(१)(d) अन्तर्गत तथा अन्य विदेशी नागरिकमाथि धारा ६(१)(c) अन्तर्गत मुद्दा दर्ता गरिएको छ। सबैलाई थप अनुसन्धान तथा कानुनी कारबाहीका लागि पुत्राजाया अध्यागमन कार्यालयमा लगिएको छ।
मलेसियाको अध्यागमन विभागले मानव तस्करी तथा अवैध आप्रवासन नियन्त्रणका लागि यस्ता विशेष कारबाही आगामी दिनमा पनि निरन्तर सञ्चालन गरिने जनाएको छ।
