क्वालालम्पुर (मलेसिया):= मलेसियाका प्रधानमन्त्री दातुक सेरी अनवर इब्राहिमले बंगलादेशी श्रमिकहरूको मलेसिया प्रवेश प्रक्रियालाई पूर्ण रूपमा सुरक्षित, पारदर्शी र व्यवस्थित बनाउने प्रतिबद्धता व्यक्त गर्नुभएको छ। बंगलादेशका प्रधानमन्त्री तारिक रहमानसँग भएको द्विपक्षीय भेटवार्तापछि उक्त निर्णय सार्वजनिक गरिएको हो।
प्रधानमन्त्री अनवरले श्रमिक भर्ना प्रक्रियामा रहेका कानुनी जटिलता, अनियमितता तथा बिचौलियाको प्रभाव हटाउँदै दुवै देशको हित हुने गरी श्रम बजारलाई व्यवस्थित गरिने बताउनुभयो। यसका लागि श्रमिक आपूर्ति गर्ने एजेन्सीहरू र सम्बन्धित संयन्त्रमाथि कडा निगरानी गरिनेछ।
यस कदमले बंगलादेशी कामदारहरूलाई ठगी, शोषण र गैरकानुनी गतिविधिबाट जोगाउनुका साथै मलेसियामा उनीहरूको कानुनी अधिकार तथा श्रम सुरक्षालाई थप मजबुत बनाउने विश्वास गरिएको छ।
भेटवार्ताका क्रममा दुवै देशबीच आर्थिक सहकार्य विस्तार गर्ने विषयमा पनि महत्वपूर्ण छलफल भएको थियो। विशेष गरी ‘द्रुत प्रक्रिया’ अन्तर्गत मुक्त व्यापार सम्झौता अघि बढाउने, व्यापारिक सम्बन्धलाई अझ सुदृढ बनाउने तथा ऊर्जा क्षेत्रमा सहकार्य विस्तार गर्ने विषयमा सकारात्मक समझदारी बनेको बताइएको छ।
त्यसैगरी, मलेसिया र बंगलादेशले रोहिंग्या शरणार्थी संकट समाधानका लागि संयुक्त रूपमा काम गर्ने प्रतिबद्धता समेत जनाएका छन्। दुवै देशले दक्षिणपूर्वी एसियाली राष्ट्रहरूको संगठन (आसियान) को संयन्त्रमार्फत म्यानमारसँग संवादलाई प्रभावकारी बनाउँदै रोहिंग्या समुदायको सुरक्षित, स्वेच्छिक र सम्मानजनक पुनःस्थापनाका लागि अन्तर्राष्ट्रिय मञ्चहरूमा साझा आवाज उठाउने सहमति गरेका छन्।
विश्लेषकहरूका अनुसार यो सहमतिले श्रम व्यवस्थापन, व्यापारिक साझेदारी तथा क्षेत्रीय मानवीय मुद्दाहरूमा मलेसिया–बंगलादेश सम्बन्धलाई थप मजबुत बनाउने अपेक्षा गरिएको छ। Source : malaysian local news
