क्वालालम्पुर (मलेसिया):= सन् २०२६ को सुरुवाती पाँच महिनामै मलेसियाको श्रम बजारमा ठूलो चुनौती देखिएको छ। मलेसियाको मानव संसाधन मन्त्रालयले संसद्मा सार्वजनिक गरेको पछिल्लो आधिकारिक तथ्याङ्कअनुसार जनवरीदेखि मे महिनासम्म ३८ हजार ९५३ जनाले आफ्नो रोजगारी गुमाएका छन्।
सामाजिक सुरक्षा संगठन (PERKESO) अन्तर्गतको रोजगार बीमा प्रणाली (EIS) मार्फत संकलन गरिएको तथ्याङ्कले देशको श्रम बजारमा बढ्दो दबाब र रोजगारी संकटको संकेत गरेको छ। सबैभन्दा बढी असर २५ देखि ३९ वर्ष उमेर समूहका युवामा परेको देखिएको छ।
कुल रोजगारी गुमाउनेमध्ये १९ हजार १३१ जना अर्थात् झण्डै ५० प्रतिशत यही उमेर समूहका रहेका छन्। यो वर्गलाई देशको सबैभन्दा उत्पादक र आर्थिक रूपमा सक्रिय जनशक्ति मानिने भएकाले यसको दीर्घकालीन प्रभाव अर्थतन्त्र र सामाजिक क्षेत्रमा समेत पर्न सक्ने विश्लेषण गरिएको छ।
मानव संसाधन मन्त्रालयका अनुसार बजारमा माग घट्नु, विश्वव्यापी आर्थिक अनिश्चितता तथा व्यवसायिक वातावरणमा आएको चुनौतीका कारण धेरै कम्पनीहरूले खर्च कटौतीको नीति अपनाइरहेका छन्।
व्यवसायलाई प्रतिस्पर्धात्मक बनाइराख्न कम्पनीहरूले संगठनात्मक पुनर्संरचना (Organisational Restructuring) र सञ्चालन प्रणालीमा सुधार (Operational Adjustments) गरिरहेका छन्, जसका कारण ठूलो संख्यामा कर्मचारी प्रभावित भएका छन्।
श्रम बजार विज्ञहरूका अनुसार रोजगार कटौतीको बढ्दो प्रवृत्तिले विशेषगरी युवा तथा मध्यम-करियरमा रहेका पेशाकर्मीहरूको आर्थिक सुरक्षा र भविष्यका अवसरहरूमा असर पार्न सक्छ। उनीहरूले सरकार र निजी क्षेत्रबीच सहकार्य गरी नयाँ रोजगारी सिर्जना, सीप विकास तथा पुनःरोजगार कार्यक्रमलाई प्राथमिकता दिनुपर्ने सुझाव दिएका छन्।
मलेसियाको अर्थतन्त्र पुनः सुदृढ बन्दै गएसँगै रोजगार बजारमा पनि सुधार आउने अपेक्षा गरिएको भए पनि हालको तथ्याङ्कले श्रम बजार अझै दबाबमा रहेको स्पष्ट संकेत गरेको छ।
