क्वालालम्पुर (मलेसिया):= मलेसियाको अध्यागमन विभाग (JIM) ले सन् २०२६ को मे ३१ सम्म देशभर सञ्चालन गरिएका विभिन्न अपरेशनहरूमा कुल ३० हजार ८०१ विदेशी नागरिकलाई पक्राउ गरेको जनाएको छ।
मलेसियाका अध्यागमन महानिर्देशक दातुक जाकारिया शाबान का अनुसार पक्राउ परेकामध्ये २ हजार ३२४ जना विदेशी नागरिकले आफूलाई प्रदान गरिएको भिसा वा पासको दुरुपयोग गरेको भेटिएको छ। उनीहरू आफ्नो प्रवेश अनुमति अनुसारको उद्देश्यभन्दा फरक गतिविधिमा संलग्न रहेको पाइएको छ।
जाकारियाले अध्यागमन पासको दुरुपयोग तथा अनुमति बिना व्यापार सञ्चालन गर्ने गतिविधिलाई विभागले अत्यन्त गम्भीर रूपमा लिएको बताएका छन्। उनका अनुसार यस्ता गतिविधिले अध्यागमन कानुन मात्र उल्लंघन नगरी सार्वजनिक सुरक्षा, सामाजिक व्यवस्था तथा राष्ट्रिय अर्थतन्त्रमा समेत नकारात्मक प्रभाव पार्न सक्छ।
यसैबीच, अध्यागमन विभागले कानुन कार्यान्वयनलाई थप प्रभावकारी बनाउन इन्स्पेक्टोरेट अफ इन्फोर्समेन्ट (Inspectorate of Enforcement) गठन गरी निगरानी तथा कारबाहीलाई सशक्त बनाएको जनाएको छ।
विभागले अध्यागमन नियम उल्लंघन गर्ने विदेशी कामदारलाई रोजगारी दिने वा संरक्षण गर्ने रोजगारदाता तथा व्यवसायीमाथि पनि कडा कारबाही गरिरहेको छ। साथै अन्य सुरक्षा निकायहरूसँग समन्वय गरी संयुक्त अपरेशनहरू सञ्चालन गरिँदै आएको छ।
व्यापारिक क्षेत्र, कार्यस्थल तथा विदेशी नागरिकको बसोबास बढी भएका स्थानहरूमा लक्षित अनुगमन तथा छापामार कारबाहीलाई अझ तीव्र बनाइएको विभागले जनाएको छ।
मलेसिया सरकारले अध्यागमन सुविधाको दुरुपयोग रोक्न, अवैध व्यापार नियन्त्रण गर्न तथा रोजगारदाताको जिम्मेवारी सुनिश्चित गर्न कडा नीति अवलम्बन गरिरहेको जाकारियाले बताएका छन्। – स्रोत: मलेसिया गजेट
