काठमाडौं := लामो रस्साकस्सीपछि नेपाल सरकारको प्रमुख प्रतिपक्ष दल नेपाली कांग्रेसले पार्टी संसदीय दलको नेता चयन गरेको छ । प्रतिनिधिसभा सदस्य चुनाव सकिएको झण्डै दुई महिनापछि कांग्रेसले पूर्व-सहमहामन्त्रीसमेत रहनुभएका सांसद भीष्मराज आङ्देम्बेलाई सर्वसम्मतिले संसदीय दल नेता चयन गरेको हो। कांग्रेस संसदीय दलको नेता चयनमा दुई महिना लामो रस्साकस्सी चलेको थियो ।
अन्ततः सोमबार नै बसेको पार्टी कार्यसम्पादन समितिको बैठकले आङ्देम्बेलाई निर्विरोध संसदीय दलको नेता बनाउने सहमति जुटाएको थियो । यसअघि संसदीय दलको नेतामा अर्जुननरसिंह केसी र मोहन आचार्यले पनि दाबी गर्दै आउनुभएको थियो । सभापति गगनकुमार थापा केसी र आचार्यमध्ये एक जनालाई संसदीय दलको नेता बनाउनुपर्ने पक्षमा हुनुहुन्थ्यो ।
उपसभापति विश्वप्रकाश शर्मा भने आङ्देम्बेलाई दलको नेता बनाउनुपर्ने अडानमा हुनुहुन्थ्यो । सभापति र उपसभापतिबीच नै मतभेद उत्पन्न भएपछि संसदीय दलको नेता चयनको लागि तय भएको चुनावको मिति पटक-पटक स्थगित भएको थियो। सोमबार बसेको संसदीय दलको बैठकमा सभापति थापाले संसदीय दल नेता आङ्देम्बेलाई प्रमाणपत्र दिनुभएको थियो । समानुपातिक तर्फबाट प्रतिनिधिसभा सांसद रहनुभएका आङ्देम्बे कांग्रेसका निवर्तमान सहमहामन्त्री हुनुहुन्छ ।
को हुन् आङ्देम्बे ?
२०२० सालमा पाँचथरको फाल्गुनन्दको नवमीडाँडामा जन्मिनुभएका आङ्देम्बे २०३६ सालको जनमतसंग्रहको बेलाबाट कांग्रेस राजनीतिमा सक्रिय हुनुभएको थियो । नेपाली कांग्रेसमा ६१ वर्षीय आङ्देम्बेको इतिहास लामो छ । आङ्देम्बेको परिवार सम्भ्रान्त भए पनि सुखसयल छाडेर बहुदलवादी राजनीति र त्यसका लागि नेपाली कांग्रेसको संगठनमा होमिएको थियो ।
आङ्देम्बे परिवारलाई पूर्वी नेपाल खासगरी पाँचथर क्षेत्रमा प्रभावशाली मानिन्छ । भीष्मका माहिला बुबा प्रेमराज आङ्देम्बे नेपाली कांग्रेसका अग्रणी नेता र बीपी कोइरालाका निकट सहयोगी हुनुहुन्थ्यो । २०१६ सालमा बीपी कोइरालाको नेतृत्वमा बनेको पहिलो जननिर्वाचित सरकारमा प्रेमराज सुरुमा ग्रामीण विकास मन्त्री र पछि खाद्य तथा कृषि राज्यमन्त्री हुनुभएको थियो ।
भीष्मका जेठा बुबा देउमान आङ्देम्बे २०१२ सालमा टंकप्रसाद आचार्य नेतृत्वको सरकारमा नेपालकै पहिलो लिम्बू मन्त्री बन्नुभएको थियो । त्यस्तै, भीष्मका बुबा घनेन्द्रराज आङ्देम्बे स्थानीय तहमा प्रभावशाली नेता हुनुहुन्थ्यो । स्वर्गीय घनेन्द्रका दुवै छोरा भीष्मराज र रामराज राजनीतिमा सक्रिय हुनुहुन्छ । रामराज जिल्ला समन्वय समिति पाँचथरका प्रमुख हुनुहुन्छ ।
भीष्मराज नेपाल विद्यार्थी संघ, नेपाल तरुण दल हुँदै नेपाली कांग्रेसको राजनीतिमा सक्रिय हुनुभएको हो । २०४२ सालमा नेविसंघ सदस्यता लिनुभएको थियो । दुईपटक नेविसंघ केन्द्रीय सदस्य भएपछि उहाँले तरुण दलको राजनीति सुरु गर्नुभएको थियो । तरुण दलमा उहाँ केन्द्रीय उपाध्यक्षसम्म हुन सफल हुनुभयो ।
आङ्देम्बेले २०५६, २०७०, २०७४ र २०७९ मा प्रत्यक्षतर्फ चुनाव लडे पनि २०७० को दोस्रो संविधानसभा निर्वाचन मात्र जित्न सफल हुनुभएको थियो । संविधानसभाको दोस्रो निर्वाचनमा निर्वाचित भएपछि आङ्देम्बे संसद्को उद्योग तथा वाणिज्य र श्रम तथा उपभोक्ता हित संरक्षण समितिको सभापति हुनुभएको थियो ।
पछिल्लो निर्वाचनमा समानुपातिकतर्फबाट प्रतिनिधिसभा सदस्य बन्नुभएका आङ्देम्बे ८० वर्ष पुरानो कांग्रेसको संसदीय दलको नेता बन्ने पहिलो जनजाति नेता बन्नुभएको छ । प्रमुख प्रतिपक्षी दलको नेताको हैसियतमा आङ्देम्बेको भूमिका कांग्रेसभित्र होइन, संसद् र संवैधानिक परिषद्मा महत्त्वपूर्ण भूमिका हुनेछ ।
