काठमाडौं := नेपालले पहिलो मैत्रीपूर्ण खेलमा अफ्रिकी देश मरिससविरुद्ध जित हात पारेको छ । त्रिपुरेश्वरस्थित दशरथ रंगशालामा शनिबार भएको खेलमा नेपालले पाहुना टोली मरिससविरुद्ध १-० को जित निकालेको हो ।
खेलपछि नेपाली राष्ट्रिय फुटबल टिमका मुख्य प्रशिक्षक अब्दुल्लाह अलमुताइरीले खेलाडीले हृदयबाटै खेलेको कारण जित निकाल्न सफल भएको प्रतिक्रिया दिएका छन् ।
‘खेलाडीले हृदयदेखि नै खेले। उनीहरुले केही विशेष देखाए । हामीले शारीरिक रुपमा बलियो टिमसँग खेलिरहेका थियौं । एसिया कपको लागि हाम्रीले राम्रो तयारी गर्यौं । आजको जित हामीलाई फाइदाजनक भयो ।’ अलमुताइरीले भने ।
उनले मैत्रीपूर्ण खेल महत्वपूर्ण भएपनि लक्ष्य एसिया कप र विश्वकप छनोट रहेको बताए । अलमुताइरीले नेपाली फ्यानले धेरै साथ दिएको भन्दै प्रशंसासमेत गरे ।
