काठमाडौं := अनलाइन मिडिया उज्यालोनेटवर्क डटकमको कार्यालयमा प्रहरीले पुनः घेरावन्दी गरेको छ । अनामनगरस्थित उज्यालोनेटवर्क अनलाइन मिडियाको कार्यकारी सम्पादक अनिश तामाङले प्रहरीले आफुहरुलाई पुनः धरपकड गरेको र नियन्त्रणमा लिइएको जानकारी फेसबुक मार्फत गराएका छ्न।
केहीदिन पहिले सो अनलाइनले प्रधानमन्त्री केपी शर्माओली र भारतीय जासुसी संस्था ‘रअ’ प्रमुख सामन्त गोयलबीचको सम्झौता भन्दै एक सामग्री प्रकाशन भएको थियो । पछि सोही अनलाइनले गल्ती स्वीकार गर्दै प्रेस काउन्सिलमा माफी समेत मागेको थियो ।
समाचार प्रकाशनपछि प्रहरीले नेटवर्कका सम्पादक बुद्ध लोप्चन सहितका पत्रकारलाई धरपकड शुरु गरेको थियो । जिल्ला अदालत काठमाडौंबाट पक्राउ अनुमति लिएर उनीहरुलाई पक्राउ गरिएको महानगरीय प्रहरी परिसर काठमाडौंका एसपी रमेश बस्नेतले बताए । उनीहरुलाई राज्य विरुद्धको कसुर र लिखतसम्बन्धी कसुरमा मुद्दा दर्ता गरिएको छ ।
सो अनलाइनमा प्रकाशित समाचारको विषयलाई लिएर धरपकड नगर्न प्रहरीको नाममा अदालतले केही दिन अगाडि नै आदेश दिइसकेको छ। तर, प्रहरीले सो आदेशको अवज्ञा गरेको छ ।
कार्यकारी सम्पादक अनिसले फेसबुकमा लेखेका छन्– ‘उज्यालो नेटवर्कको कार्यलयमा प्रहरीले पुनः धरपकड गरेको छ । म लगायत उज्यालो नेटवर्कको पत्रकारहरुलाई प्रहरीले उज्यालो नेटवर्ककै कार्यलयमा नियन्त्रणमा राखेको जानकारी गराउन चहान्छु ।’
