क्वालालम्पुर (मलेसिया):= मलेसियाका पूर्वप्रधानमन्त्री दातुक सेरी नाजिब रजाकले एसआरसी इन्टरनेशनल भ्रष्टाचार प्रकरणमा अदालतले तोकेको आरएम ५० मिलियन मलेसियन रिङ्गिट जरिवाना भुक्तान गरेका छन्।
जरिवाना चुक्ता गरेसँगै उनलाई जेलबाट घरमै नजरबन्दमा बसेर बाँकी कैद सजाय पूरा गर्ने बाटो खुलेको छ। मलेसियाका संघीय राजा सुल्तान इब्राहिमबाट प्रदान गरिएको ससर्त शाही माफीअन्तर्गतको प्रमुख सर्त पूरा गरेपछि नाजिबलाई काजाङ जेलबाट क्वालालम्पुरस्थित आफ्नै निवासमा स्थानान्तरण गरिएको छ।
अब उनले घटाइएको कैद सजायको बाँकी अवधि अर्थात् २३ अगस्ट २०२८ सम्म जेलमा नभई आफ्नै घरमा नजरबन्दमा बिताउनेछन्। यससँगै लामो समयदेखि जेल जीवन बिताइरहेका मलेसियाका पूर्वप्रधानमन्त्रीले घरमै बसेर सजाय पूरा गर्ने सुविधा पाउने भएका छन्।
यद्यपि, नाजिबका कानुनी चुनौती भने अझै समाप्त भएका छैनन्। मलेसियाको चर्चित १एमडीबी (1MDB) आर्थिक घोटाला प्रकरणमा उनीमाथि छुट्टै १५ वर्षको कैद सजाय र ११.४ अर्ब मलेसियन रिङ्गिट जरिवाना तोकिएको छ। उक्त मुद्दासम्बन्धी कानुनी प्रक्रिया र पुनरावेदनसमेत जारी रहेको छ।
१ एमडीबी प्रकरणमा अन्तिम कानुनी फैसला उनका प्रतिकूल आएमा सन् २०२८ अगस्टमा हालको सजाय अवधि पूरा भएपछि पनि उनले पुनः जेल जीवन बिताउनुपर्ने अवस्था आउन सक्छ।
यसर्थ, एसआरसी प्रकरणमा जरिवाना भुक्तान गरी घरमै नजरबन्दको सुविधा पाए पनि नाजिबको राजनीतिक तथा कानुनी भविष्य भने अझै १एमडीबी घोटाला प्रकरणको अन्तिम फैसलामा निर्भर रहने देखिन्छ।
स्रोत : स्थानीय सञ्चारमाध्यम
