क्वालालम्पुर := विश्वव्यापी बजारमा हवाई इन्धन (Aviation Fuel) को मूल्य लगातार बढेपछि मलेसियाको राष्ट्रिय ध्वजावाहक वायुसेवा मलेसिया एयरलाइन्स ले आफ्नो हवाई टिकटको भाडा २० देखि ३० प्रतिशतसम्म वृद्धि गरेको छ।
मलेसिया एभिएसन ग्रुप (MAG) का अनुसार पछिल्लो समय बढ्दो भू-राजनीतिक तनावका कारण हवाई इन्धनको मूल्यमा तीव्र वृद्धि भएको छ। यसले एयरलाइन्सको सञ्चालन खर्च उल्लेख्य रूपमा बढाएको छ।
कम्पनीका अनुसार यसअघि कुल सञ्चालन खर्चमध्ये इन्धनको हिस्सा करिब ३० प्रतिशत रहेकोमा हाल बढेर झन्डै ५० प्रतिशत पुगेको छ। यही कारण यात्रु भाडा समायोजन गर्नुपरेको कम्पनीले जनाएको छ।
यो मूल्यवृद्धि केवल मलेसिया एयरलाइन्समा मात्र सीमित नभई विश्वभरका धेरै वायुसेवा कम्पनीहरूले पनि बढ्दो इन्धन लागतका कारण समान कदम चालिरहेका छन्।
बढ्दो खर्च नियन्त्रण गर्न मलेसिया एयरलाइन्सले फ्युल हेजिङ (Fuel Hedging) रणनीतिलाई थप प्रभावकारी बनाएको जनाएको छ। साथै, भविष्यमा सञ्चालन खर्च घटाउन इन्धन कम खपत गर्ने आधुनिक र अत्याधुनिक विमानहरू आफ्नो बेडामा थप्ने योजना पनि तीव्र रूपमा अघि बढाइएको कम्पनीले जानकारी दिएको छ।
यस निर्णयले विशेषगरी नेपाल–मलेसिया लगायत अन्तर्राष्ट्रिय गन्तव्यमा यात्रा गर्ने यात्रुहरूको खर्च बढ्ने सम्भावना बढेको छ। स्रोत : स्थानीय मिडिया
