क्वालालम्पुर (मलेसिया):= मलेसिया सरकारले देशको यातायात, ढुवानी र हवाई क्षेत्रमा देखिएको तीव्र जनशक्ति अभावलाई समाधान गर्न एउटा ठूलो र रणनीतिक कदम चालेको छ। सरकारले अब सेनाबाट अवकाश पाउन लागेका र पाइसकेका सैनिकहरूलाई व्यावसायिक सवारी चालक र विमान प्राविधिकका रूपमा परिचालन गर्ने भएको छ।
यस नयाँ पहलअन्तर्गत भूतपूर्व सैनिकहरूले देशको आर्थिक विकासमा योगदान पुर्याउनुका साथै आकर्षक नयाँ रोजगारीका अवसरहरू समेत प्राप्त गर्नेछन्।
मलेसियाको यातायात मन्त्रालय र रक्षा मन्त्रालयबीच भएको विशेष सम्झौताअनुसार पहिलो चरणमा यातायात र लजिस्टिक क्षेत्रमा ३,२०८ वटा रोजगारीका अवसरहरू सिर्जना गरिएको छ।
भूतपूर्व सैनिक मामिला निगम (Perhebat) ले मलेसिया रेल डेभलपमेन्ट कर्पोरेसन र अन्य १० वटा ठूला ढुवानी कम्पनीहरूसँग मिलेर यो कार्यक्रम अघि बढाएको हो।
विशेष गरी बन्दरगाह र औद्योगिक क्षेत्रहरूमा हेभी गाडी चलाउने तथा विमान मर्मत सम्भार गर्ने ‘एभिएसन प्राविधिक’ को अभाव टार्न यी सैनिकहरूलाई प्राथमिकता दिइनेछ।
मलेसिया सरकारले यस योजनालाई देशको प्राविधिक तथा व्यावसायिक शिक्षा र तालिम (TVET) क्षेत्रको लागि एउटा “गेम चेन्जर” कदमको रूपमा व्याख्या गरेको छ। सैनिकहरूमा हुने उच्च अनुशासन, सुरक्षा सचेतता र कडा मिहिनेत गर्ने बानीका कारण उनीहरू यस कार्यका लागि सबैभन्दा उपयुक्त पात्र भएको सरकारको ठहर छ।
यो योजनाले एकातिर मलेसियाको लजिस्टिक र उड्डयन उद्योगको आर्थिक र कामदार अभावको संकट टार्ने विश्वास गरिएको छ भने, अर्कोतिर सानै उमेरमा (साधारणतया ४० वर्ष आसपास) सैनिक सेवाबाट अवकाश पाउने नागरिकहरूलाई बलियो आर्थिक सुरक्षा र दोस्रो करियरको ग्यारेन्टी गर्नेछ।
