काठमाडौं := नेपाली फुटबल खेलाडीहरूको छाता संगठन नेपाल फुटबल खेलाडी संघले आइतबार अखिल नेपाल फुटबल संघ (एन्फा)को मुख्यालयमा तालाबन्दी गरेको छ । लामो समयदेखि उठाइँदै आएका मागप्रति एन्फाले बेवास्ता गरेको भन्दै संघले आइतबार दिउँसो एन्फाको सातदोबाटोस्थित कार्यालयमा तालाबन्दी गरेको हो ।
संघका पदाधिकारी र खेलाडीहरू एन्फा मुख्यालय पुगेपछि कार्यालय परिसरमा तालाबन्दी गर्दै आफ्ना मागहरू तत्काल सम्बोधन गर्न एन्फा नेतृत्वलाई दबाब दिएका हुन् । खेलाडी संघका अनुसार, नेपाली फुटबलको विकास, खेलाडीहरूको अधिकार र पेशागत सुरक्षासँग सम्बन्धित विषयमा पटक-पटक ध्यानाकर्षण गराउँदा पनि एन्फाबाट ठोस पहल नभएपछि बाध्य भएर आन्दोलन सुरु गर्नुपरेको हो ।
‘पटक-पटक वार्ता र सडक संघर्षका बाबजुद पनि हाम्रा जायज मागहरू एन्फाले बेवास्ता गरेका कारण हाम्रा मागहरू पूरा नगरेसम्म अखिल नेपाल फुटवल संघ (एन्फा) को मुख्यालयमा तालाबन्दी गर्ने निर्णय गरेका छौं’, विज्ञप्तिमा भनिएको छ ।
खेलाडी संघले यसअघि पनि विभिन्न माध्यमबाट आफ्ना मागहरू राख्दै आएको जनाएको छ । संघले संवाद, ज्ञापनपत्र तथा भेटघाटमार्फत् समाधान खोज्ने प्रयास गरे पनि एन्फाले मागप्रति चासो नदिएको आरोप लगाएको छ । त्यसपछि दबाबमूलक कार्यक्रमस्वरूप तालाबन्दी गरिएको संघका प्रतिनिधिहरूले बताएका छन् ।
तीनबुँदे माग
तालाबन्दीसँगै संघले एन्फासमक्ष तीनबुँदे माग प्रस्तुत गरेको छ । तीमध्ये प्रमुख माग शहीद स्मारक ‘ए’ डिभिजन लिग सञ्चालनको निश्चितता हो । लामो समयदेखि नियमित रूपमा लिग आयोजना नहुँदा खेलाडीहरूको पेशागत भविष्य अन्योलमा परेको संघले जनाएको छ । संघले लिग फुटबल नेपाली खेलाडीहरूको मुख्य प्रतिस्पर्धात्मक प्लेटफर्म भएकाले यसको नियमित सञ्चालन सुनिश्चित गर्न एन्फाले स्पष्ट कार्ययोजना सार्वजनिक गर्नुपर्ने माग गरेको छ ।
त्यस्तै, खेलाडीहरूको हितका लागि स्थापना गरिने खेलाडी अक्षय कोषसम्बन्धी कार्य तत्काल अघि बढाउन पनि संघले माग गरेको छ । संघका अनुसार, खेलाडीहरूको स्वास्थ्य, आपत्कालीन सहयोग तथा भविष्य सुरक्षाका लागि यस्तो कोष अत्यन्त आवश्यक रहेको छ ।
तेस्रो मागका रूपमा संघले खेलाडीहरूले पाउनुपर्ने तलबभत्ता तथा पुरस्कार रकम समयमै उपलब्ध गराउन आग्रह गरेको छ। विभिन्न प्रतियोगिता तथा गतिविधिमा सहभागी खेलाडीहरूले लामो समयसम्म पारिश्रमिक र पुरस्कार रकम नपाएको गुनासो संघले उठाएको छ । संघले यी मागहरूको कार्यान्वयन नहुँदै सहमतिबिना ताला खोले उक्त कदमबाट आइपर्ने क्षतिको जिम्मेवार एन्फा आफैं हुने चेतावनी दिएको छ ।
खेलाडीहरूको असन्तुष्टि
संघका पदाधिकारीहरूका अनुसार, नेपाली फुटबलमा खेलाडीहरूको भूमिका महत्वपूर्ण भए पनि उनीहरूको पेशागत अधिकार र सुरक्षाको विषयमा पर्याप्त ध्यान नदिइएको अवस्था रहेको छ । नियमित प्रतियोगिता नहुनु, पारिश्रमिक ढिलाइ हुनु तथा खेलाडी कल्याणका योजनाहरू प्रभावकारी रूपमा कार्यान्वयन नहुनुले खेलाडीहरू निराश भएको उनीहरूको भनाइ छ ।
खेलाडी संघले आफ्ना मागहरू सम्बोधन नभएसम्म थप आन्दोलनका कार्यक्रम सार्वजनिक गर्न सकिने संकेत पनि दिएको छ । संघले एन्फा नेतृत्वसँग वार्ता र संवादमार्फत् समस्या समाधान गर्न तयार रहेको तर त्यसका लागि एन्फाले पहल गर्नुपर्ने बताएको छ । तालाबन्दीको घटनापछि एन्फा नेतृत्वबाट औपचारिक प्रतिक्रिया भने सार्वजनिक भएको छैन । एन्फाले खेलाडी संघका मागबारे छलफल गरेर आवश्यक निर्णय लिने अपेक्षा गरिएको छ ।
नेपाली फुटबलको समग्र विकासका लागि खेलाडी, संघसंस्था र प्रशासनबीच सहकार्य आवश्यक हुने भन्दै खेलाडी संघले संवादमार्फत् समाधान खोज्नुपर्नेमा जोड दिएको छ । खेलाडीहरूको हित र नेपाली फुटबलको भविष्य सुरक्षित गर्न सरोकारवाला सबै पक्षले जिम्मेवार भूमिका खेल्नुपर्ने संघको भनाइ छ।
