क्वालालम्पुर (मलेसिया):= मलेसियाको अध्यागमन विभाग (Jabatan Imigresen Malaysia – JIM) ले गुप्तचर तथा विशेष अपरेसन शाखामार्फत २७ जनवरी २०२६ मा क्वालालम्पुर आसपासका तीन स्थान तथा सेलेङ्गोरको पुचोङ क्षेत्रको एक स्थानमा संयुक्त अपरेसन सञ्चालन गरी १९ विदेशी नागरिकलाई पक्राउ गरेको छ।
दुई हप्तासम्म गरिएको गुप्तचर सूचनाको आधारमा अपरेसन टोलीलाई सौन्दर्य केन्द्रका रूपमा सञ्चालन भइरहेका व्यावसायिक परिसरहरूमा पठाइएको थियो। उक्त अपरेसनमा २२ देखि ४८ वर्ष उमेर समूहका १२ जना फिलिपिन्सकी महिला, ६ जना भियतनामकी महिला र १ जना मङ्गोलियाकी महिला पक्राउ परेका छन्।
प्रारम्भिक जाँचमा पक्राउ परेका भियतनामका ३ महिलासँग सामाजिक भ्रमण पास (PLS), मङ्गोलियाकी १ महिलासँग विद्यार्थी पास, १२ जना फिलिपिन्सकी महिलासँग घरेलु सहयोगी पास रहेको पाइयो। अन्य केही विदेशी नागरिकसँग भने मलेसियामा बस्नका लागि आवश्यक वैध पास वा यात्रा कागजात नभएको पुष्टि भएको छ।
अपरेसनका क्रममा ९ वटा फिलिपिन्स पासपोर्ट, ३ वटा भियतनाम पासपोर्ट, १ वटा मङ्गोलिया पासपोर्ट, ५ थान मोबाइल फोन, QR भुक्तानी स्क्यानर, कर्मचारी रेकर्ड पुस्तिका, कारोबार विवरण पुस्तिका, व्यवसाय इजाजतपत्र, कम्पनी आयोग मलेसिया (SSM) सम्बन्धी कागजात तथा करिब अरएम १५००नगद रकम बरामद गरिएको छ। उक्त रकम अनैतिक क्रियाकलापबाट आएको आशंका गरिएको छ।
उक्त परिसरले आफूलाई वैध सौन्दर्य केन्द्रको रूपमा दर्ता गरी साइनबोर्ड र सौन्दर्य सेवा देखाउँदै अधिकारीहरूलाई झुक्याउने गरेको पाइएको छ। यी गतिविधिहरू खुला रूपमा विज्ञापन नगरी टेलिग्राम र ह्वाट्सएपमार्फत छानिएका ग्राहकहरूलाई मात्र जानकारी दिइन्थ्यो।
आउने ग्राहकलाई सामान्य मसाज सेवा प्रस्ताव गरिन्थ्यो र अतिरिक्त सेवाका लागि गोप्य कोड प्रयोग गरिन्थ्यो। परिसरको भित्री भागमा कडाइका साथ सुरक्षा प्रणाली जडान गरिएको थियो। सेवाको शुल्क अरएम २००देखि अरएम २५०सम्म लिइन्थ्यो र यो गतिविधि गत वर्ष मार्चदेखि सञ्चालनमा रहेको विश्वास गरिएको छ।
पक्राउ परेका सबै विदेशी नागरिकले आप्रवासन ऐन १९५९/६३ अन्तर्गत अपराध गरेको आशंकामा थप कारबाहीका लागि पुट्राजया आप्रवासन कार्यालयमा लगिएको छ। साथै, अनुसन्धानमा सहयोग गर्न ७ जना स्थानीय पुरुषलाई कार्यालयमा उपस्थित हुन नोटिस दिइएको छ।
विभागले देशको कानुन उल्लङ्घन गर्ने कुनै पनि गतिविधि नियन्त्रण गर्न कडा कदम जारी राख्ने जनाएको छ, ताकि देशको स्थिरता र समृद्धि कायम रहोस् — मादानी सरकारको उद्देश्य अनुरूप। फोटो र समाचार स्रोत : अध्यागमन विभाग मलेसिया ।
