एजेन्सी := क्रुनाल पाण्डेको अलराउण्ड प्रदर्शनको सहयोगमा रोयल च्यालेन्जर बंग्लोरु (आरसिबी)ले दिल्ली क्यापिटललाई हराउँदै यस सिजनको आइपिएलमा प्ले अफ सम्भावना बलियो बनाएको छ। यो जितसँगै आरसिबी आईपीएल तालिकाको शीर्ष स्थानमा पुगेको छ। १० मा सात खेल जितेको आरसिबीको १४ अंक छ।
आइतबार भएको खेलमा बंग्लोरुले दिल्लीलाई ६ विकेटले हराएको हो। १६३ रनको लक्ष्य पछ्याएको बंग्लोरुले ९ बल बाँकी रहँदा चार विकेटको क्षतिमा १६५ रनको योगफल खडा गरेको हो। २६ रनमा तेस्रो विकेट गुमाएपछि ब्याटिङ गर्न आएका पाण्डेले अविजित रहँदै ४७ बलमा ७३ रन बनाउनुभएकाे थियाे ।
उहाँले विराट कोहलीसँग मिलेर चौथो विकेटका लागि ११९ रनको साझेदारी गर्नुभयाे । कोहलीले ४७ बलमा ५१ रन बनाउनुभयाे । टिम डेभिडले अविजित रहँदै ५ बलमा १९ रन बनाउनुभयाे । दिल्लीका कप्तान अक्षर पटेलले ४ ओभरमा १९ रन खर्चेर दुई विकेट लिनुभयाे ।
यसअघि टस हारेर पहिले ब्याटिङ गरेको घरेलु टोली दिल्लीले आठ विकेटको क्षतिमा १६२ रन जोडेको थियो। दिल्लीका लागि के एल राहुलले सर्वाधिक ४१ रन बनाउनुभयाे । धिमा गतिमा खेलेका उहाँले ३९ बलको सामना गर्नुभएकाे थियाे । ट्रिस्टयन स्टब्सले १८ बलमा ३४ रन बनाउनुभयाे ।
आरसिबीका भुवनेश्वर कुमारले चार ओभरमा ३३ रन खर्चेर तीन तथा जोस हजेलउडले चार ओभरमा ३६ रन खर्चेर दुई विकेट लिनुभयाे । पाण्डेले चार ओभरमा २८ रन खर्चेर एक विकेट लिनुभयाे । किफायती बलिङ गरेका सुयास शर्माले चार ओभरमा २२ रन मात्र खर्चिनुभयाे ।
१० खेलमा १४ अङ्क सहित आरसिबी शीर्ष स्थानमा उक्लिएको हो। ९ खेलमा १२ अंक बनाएको दिल्ली तालिकाको चौथो स्थानमा छ। गुजरात र मुम्बईको समान १२ अंक भए पनि रनरेटका आधारमा अगाडि छन्।
