एजेन्सी := भारतीय प्रधानमन्त्री नरेन्द्र मोदीले सर्वदलीय बैठक बोलाएका छन्। पहलगाममा भएको आतंकावादी हमलाको बारेमा दलहरुको धारणा तय गर्न प्रधानमन्त्री मोदीले संसदमा प्रतिनिधित्व गर्ने दललाई बैठकमा बोलाएका छन्।
मंगलबार राति जम्मु काश्मिरको पर्यटकीय क्षेत्र पहलगाममा पाकिस्तानी आतंकबादी संगठनले नेपाली पर्यटक सुदीप न्यौपानेसहित २८ जनाको हत्या गरेका थिए। कयौं घाइते भएका छन्। आतंकवादीको हमलाका कारण साउदी अरबमा रहेका मोदी भ्रमण छोट्याएर स्वदेश फर्किएका छन्।
भारतले पाकिस्तानी नागरिकलाई ४८ घण्टाभित्र भारत छाड्न आदेश दिएको छ भने पाकिस्तानबाट आफ्ना कुटनीतिज्ञलाई फिर्ता बोलाएको छ। भारतले पाकिस्तानसँग रहेको सिन्धु जल सन्धिलाई पनि स्थगित गर्ने निर्णय गरेको छ। भारत र पाकिस्तानबीच रहेको सिन्धु जल सन्धि सफल अन्तर्राष्ट्रिय सन्धिका रूपमा हेरिन्छ। दुई देशबीच पटक–पटक युद्ध हुँदा पनि उक्त सन्धिमा असर पर्ने गरेको थिएन।
दुई देशबीच सन् १९६० मा उक्त सन्धि भएको थियो। त्यस्तै पाकिस्तानी नागरिकले सार्क राष्ट्रका सदस्यका नाताले पाउँदै आएको भिसा छुट योजना पनि बन्द गरिएको छ। त्यस्तै, पञ्जाबमा दुई देशको सिमानामा रहेको अटारी एकीकृत चेक पोस्टलाई बन्द गर्ने निर्णय पनि भारत सरकारले गरेको छ ।
यता पाकिस्तानलले पनि राष्ट्रिय सुरक्षा समितिको बैठक बोलाएको छ। पहलगाम हमलापछि भारतको गैरजिम्मेवार आरोप लगाएको भन्दै प्रधानमन्त्री शहबाज शरीफले राष्ट्रिय सुरक्षा समितिको बैठक बोलाएका छन्।पछिल्लो परिस्थितको विश्लेषणका लागि प्रधानमन्त्री शरीफले बैठक बोलाएको रेडियो पाकिस्तानले जनाएको छ।
यसैबीच पाकिस्तानका रक्षामन्त्री ख्वाजा आसिफले कुनै पनि भारतीय आक्रमणको उचित जवाफ दिन आफूहरू तयार रहेको बताएका छन्। भारतले सिन्धु जल सन्धि निलम्बन, अटारी सीमा बन्दलगायत आफूविरुद्ध पाँच निर्णय गरेपछि पाकिस्तान रुष्ट भएको छ।
उनले भनेका छन्, ‘पाकिस्तान कुनै पनि भारतीय आक्रमणको उचित जवाफ दिन १०० प्रतिशत स्थितिमा छ।’ यद्यपि उनले जम्मु-कश्मीरमा भएको हमला निन्दनीय भएको र आतंकवादलाई कुनै पनि हिसाबले समर्थन गर्न नसकिने बताएका छन्।
पाकिस्तानका रक्षामन्त्रीका अनुसार, ‘भारतको संरक्षणमा बलुचिस्तानमा आतंकवाद फस्टाउँदै छ। जाफर एक्सप्रेस घटनामा के भयो भन्ने सबैलाई थाहा छ। भारतले पृथकतावादीहरूलाई आश्रय दिएको छ। बलुचिस्तानका पृथकतावादीहरू उपचारका लागि भारत जान्छन्। यसका धेरै प्रमाण छन्।’
ख्वाजा आसिफले भारतले पहलगाम घटनाका लागि अरूलाई दोष दिनुको सट्टा आफैँलाई जिम्मेवार बनाउनुपर्ने सुझाव पनि दिएका छन्। उनले भने, ‘यो पनि सम्भव छ कि पहलगाम आक्रमण भारत आफैँले गरेको ‘झुटा अपरेसन’ थियो।’ उनले थपे, ‘कसैले भारतलाई सोध्नु पर्छ- यदि कश्मीरमा निर्दोष मानिसहरू मारिरहेका छन् भने दशकौँदेखि त्यहाँ उपस्थित ७ लाख सैनिक के गरिरहेका छन्?’
