काठमाडौं:= बडा दशैँको छेको पारेर यही असोज २४ गते फूलपातीदेखि प्रदर्शनमा आउन लागेको चलचित्र ‘छक्का पञ्जा-५’ को दोस्रो गीत ‘ब्रेकअप’ सार्वजनिक गरिएको छ । बुधबार सार्वजनिक गीतमा बाबुल गिरीको स्वर, संगीत र शब्द रचना छ ।
सार्वजनिक गीतमा चलचित्रका कलाकारहरू दीपकराज गिरी, केदार घिमिरे, दीपाश्री निरौला, वर्षा सिवाकोटी, मेक्सम गौडेल, सुरवीर पण्डित र रामेश्वर केसीलाई प्रस्तुत गरिएको छ । जसमा पूर्वप्रेमिकाप्रति पोखिएको आक्रोशलाई निकै रमाइलो शैलीमा देखाइएको छ । चलचित्रको पहिलो गीत ‘बिहे भाको छैन म’ सार्वजनिक गरिएको थियो ।
दीपाश्री निरौलाको निर्देशनमा तयार भएको चलचित्रमा आर्यन सिग्देल, निर्मल शर्मा, तेज गिरीलगायतको पनि अभिनय छ । हरि हुमागाईंको डिओपी तथा उत्तम हुमागाईंको छायांकन रहेको चलचित्रमा दीपकराज स्वयंको पटकथा लेखन छ भने कथा र संवादमा उनलाई केदार घिमिरे र दीलिप तामाङले सघाउनुभएको छ । चलचित्रमा रोशन श्रेष्ठको द्वन्द्व निर्देशन तथा विपिन मल्लको सम्पादन छ ।
‘छक्का पञ्जा’को अघिल्ला चार सिरिज सफल भएका थिए । पाँचौं सिरिज पनि सफल हुनेमा निर्माणपक्ष आशावादी रहेको छ । तर, यसपटक यही मितिमा दुई ठूला स्वदेशी चलचित्र ‘१२ गाउँ’ र ‘ज्वाइँ साब’ प्रदर्शनमा आउन लागेका छन् । यसले ‘छक्का पञ्जा-५’लाई असर गर्न सक्ने आंकलन गरिएको छ ।
