शेरबहादुरको गन्तव्य म्याडम साहेव, प्रचण्डको गन्तव्य सुपुत्री, माधव नेपालको त के कुरा गरौं ?: ओली।

काठमाडौं:= एमाले अध्यक्ष केपी ओलीले अहिले जस्तो राज्यसंयन्त्रको दुरुपयोग कहिले नभएको पनि दाबी गर्नुभएको छ। शुक्रबार एमालेको कार्यशाला गोष्ठीमा ओलीले कानुन नभएको शासन जस्तो अहिलेको सरकार रहेको बताउनु भयो। ‘राज्यसत्ताको यो भन्दा नग्न दुरुपयोग कहिले भएको थिएन । महान्यायाधिवक्ताको कामै मान्छे मार्नेको जाहेरी नलिन दबाब दिने गरेका छन् । कति सारो खेलवाड ?’ ओलीले भन्नुभयो ।

उहाँले अहिलेको पाँचदलीय गठबन्धनका नेताहरूसँग कुनै गन्तव्य नभएको बताउनु भयो। सबैको व्यक्तिगत स्वार्थ मात्र रहेको भन्दै उहाँले शीर्ष नेताहरूप्रति कटाक्ष गर्नुभयो। पाँच वर्ष यो गठबन्धनले सरकार चलाउने भने देश ध्वस्त हुने आरोप लगाउनु भयो । ‘अहिलेका नेताको कुनै गन्तव्य छैन ।

मोहनविक्रम सिंहको गन्तव्य प्युठान । शेरबहादुरको गन्तव्य म्याडम साहेव । प्रचण्डको गन्तव्य सुपुत्री । माधव नेपालको त के कुरा गरौं । उनको जिन्दगी छटपटीमै बित्छ । करबटे बदल्ते रहे सारे रात हम जस्तो छ । गन्तव्य केही पनि छैन,’ ओलीले भन्नुभयो ।