कतारका नेपालीलाई इदमा निषेधित पेय पदार्थको उपभोग तथा विक्री वितरण नगर्न दूतावासको आग्रह।

कतार := ईस्लाम धर्मावलम्बीहरूको महान पर्व ईद–अल–अदा संयमित भएर मनाउन नेपाली समूदायलाई कतारस्थित नेपाली दूतावासले आग्रह गरेको छ।

कतारमा कार्यरत नेपाली कामदारलाई ईद इस्लाम धर्मावलम्बीको पवित्र चाड भएको स्मरण गराउँदै दूतावासले यहाँको धर्म, संस्कृति, परम्परा र मान्यताविपरित कुनै पनि कार्य नगर्न आग्रह गरेको हो। दूतावासले विशेषत जाँडरक्सी जस्ता निषेधित पेय पदार्थतर्फ लक्षित गर्दै यसको बेचबिखन र सार्वजनिक स्थलमा उपभोग गर्न–नगराउन अनुरोध गरेको छ।

कतारले इदको उपलक्ष्यमा श्रमिकलाई तीन दिनको बिदा दिएको छ। दूतावासद्धारा जारी विज्ञप्तीमा भनिएको छ, ‘बिदा मनाउने क्रममा कतारको धर्म, संस्कृति, परम्परा र मान्यता विपरित हुने कुनै पनि कार्य नगर्नुहुनका साथै निषेधित खाद्य तथा पेय पदार्थको बेचबिखन गर्ने तथा सार्वजानिक स्थलहरुमा उपभोग गरी अनावश्यक जमघट गर्ने कार्य नगर्नु नगराउनु हुन सबैमा अनुरोध छ ।’